MADEREVA WA SERIKALI WANAOKIUKA SHERIA ZA BARABARANI WATIWE MBARONI,RC-BABU

Posted on: January 25th, 2025

Mkuu Mkoa wa Kilimanjaro Mhe.Nurdin Babu amemwagiza Mkuu wa Kitengo cha usalama barabarani mkoani hapa(RTO) Nassoro Sisiwaya kuwachukulia hatua kali baadhi ya madereva wa serikali wanaokiuka sheria za barabarani.

Akizungumza wakati akifungua kikao cha Madereva  kilichofanyika Januari 25,2025 katika Manispaa ya Moshi Mhe.Babu amesema

"Ndugu zangu nyie ni madereva wa serikali Katibu wenu amesema mnatii sheria za barabarani lakini sio kweli,kuna baadhi yenu amfuati alama za usalama barabarani mnaendesha magari kwa kasi kubwa sasa namwagiza RTO yuko hapa dereva yeyote wa serikali atakae bainika anaendesha gari kwa kasi bila kutii sheria za barabara akamatwe na achukuliwe hatua".

Aidha ameendelea kuwasisitiza madereva hao kuwa mfano mzuri wa kuigwa kwenye jamii kwani ni watumishi wa Umma hivyo wanapaswa kufanya Kazi kwa kuzingatia Sheria na kanuni za utumishi wa Umma.

Hata hivyo Katibu Tawala wa Mkoa Bw.Kiseo Nzowa amewaonya madereva hao kuacha kujiingiza katika masuala ya ulevi ili waweze kutekeleza majukumu yao kwa ufanisi.

“madereva mnatakiwa kuepuka kujiingiza katika masuala ya utovu wa nidhamu hasa katika swala la ulevi pia dereva unatakiwa kutunza siri ya kiongozi wako huna sababu ya kuyatoa nnje ili kulinda heshima ya kiongozi”  

Kwa upande wake Naibu  Katibu Mkuu  wa Chama  Cha  Madereva wa serikali Tanzania Ndg.Venus Wanyangi ameishuru Serikali ya awamu ya sita inayoongozwa na Rais Dkt.Samia Suluhu Hassan kwa kutatua changamoto mbalimbali za chama hicho na hata zingine ambazo   zinaendelea kufanyiwa kazi.