MHE MGHWIRA: WANUFAIKA WA MISAMAHA WAELIMISHWE

Posted on: September 5th, 2017

Watumishi wa umma katika  hospitali ya  Rufaa ya Mkoa wa Kilimanjaro (mawenzi) wameagizwa  kuwaelimisha wananchi juu  ya haki zao za kisheria na kisera hususan misamaha ya uchangiaji wa gharama za matibabu kwa wazee, wajawazito na watoto.

Agizo hilo limetolewa na Mkuu wa Mkoa wa Kilimanjaro Mhe. Anna Mghwira alipofanya ziara ya kushtukiza ili kujionea mwenendo wa utoaji wa huduma kwa wanannchi katika hospitali hiyo.

Akizungumza baada ya ziara hiyo Mhe.Mghwira amesema miongoni mwa changamoto alizozigundua ni pamoja na baadhi ya wanufaika wa misamaha ya uchangiaji wa gharama za matibabu kutojua kuwa wana haki ya kupata matibabu pasipo kuchangia gharama.

Kuhusu  wagonjwa wenye sifa za misamaha ambao wamepatwa na dharula mbalimbali ikiwemo kutobeba vielelezo vya misamaha hiyo, Mhe. Mghwira  amewataka watoa huduma hao kuweka kipaumbele kwenye kuokoa maisha ya watu baada ya hapo zifuatwe taratibu za kupata vielelezo ili wapate misamaha.

"Kama mzeee  ameshafika hospitali akiwa na hali mbaya lakini amesahau kadi yake ya msamaha wa uchangiaji wa huduma asirudishwe nyumbani, hakikisheni mnamhudumia kwanza huku mkifanya juhudi za kupata uthibitisho wa msamaha wake." alisema Mhe. Mghwira.

Kwa  upande wake katibu Tawala wa Mkoa wa Kilimanjaro Mhandisi Aisha Amour ameuagiza uongozi wa hospitali kuweka mabango yanayotoa elimu kwa makundi yaliyopewa  msamaha ili iwarahisishie kujua waende wapi ili wapate huduma kwa mujibu wa sheria na miongozo ya serikali.

Ameongeza  kuwa endapo mabango hayo yatachakaa yawekwe mengine iwezekanavyo ili wananchi hao wasihangaike katika kupata huduma hizo.

Kwa upande wake Kaimu Mganga Mfawidhi wa Mkoa  Jonas Mcharo ameahidi kufanyia kazi maelekezo  na maagizo yote yaliyotolewa na Mkuu wa Mkoa na Katibu Tawala wa Mkoa.