RC KAGAIGAI: HALMASHAURI TOENI 10% KWA WAKATI

Posted on: June 25th, 2021

Halmashauri Mkoani Kilimanjaro zimetakiwa kuhakikisha zinatenga  asilimia 10 kwa wakati kutoka kwenye mapato ya ndani  kwa ajili ya  Wanawake, Vijana na Watu wenye Ulemavu.

Aliyasema  hayo wilayani Rombo  Mkuu wa Mkoa wa Kilimanjaro Mhe. Stephen  Kagaigai katika kikao cha Baraza Maalum la Madiwani  cha kujadili  Taarifa ya Mdhibiti na Mkaguzi Mkuu wa Hesabu za Serikali (CAG) kwa mwaka wa fedha 2019/2020.

Alisema ni wajibu wa kila halmashauri kufuata kanuni  namba 5.5(1)ya Sera ya Mikopo kwa vikundi vya Wanawake, Vijana na Watu wenye Ulemavu iliyofanyiwa mabadiliko mwaka 2019 lengo likiwa ni kusaidia ukuzwaji wa  mwananchi mmoja moja na taifa kwa ujumla.

"Rais wa Jamuhuri ya Muungano wa Tanzania Samia Suluhu Hassani anamatamanio makubwa sana ya nchi  hii kusonga mbele, lakini haiwezi kusonga mbele bila kufanya kazi, hivyo naagiza fedha hizo  zitolewe ili kwenda kuinua wananchi kiuchumi hasa yale makundi yaliyoelekezwa, Vijana, Wanawake na  Watu wenye Ulemavu''.

Wakati huo  huo Mhe. Kagaigai aliwataka wananchi wa mkoani hapa,   kuchukua taadhari dhidi ya ugonjwa wa Corona (COVID -1 9) huku akisema ni wajibu wa kila mmoja kwa mujibu wa taratibu za Wizara ya Afya.

Alisema kuwa  ugonjwa huu upo lakini haipaswi kuchukuliwa kwa hofu bali ni kwa taadhari kama yalivyo magonjwa ya malaria kwa  kuweka  chandarua .

"Ugonjwa huu upo na ningependa wananchi tuendeleze  utamaduni wetu tuliokuwa tunaufanya awali wa kunawa mikono mara kwa mara, kupaka vitakasa mikono  na kuvaa barakoa pale mnapokuwa kwenye mikusanyiko, na uzingatie umbali wa kutosha   kwa mujibu wa Wizara ya Afya".

Kwa upande wake Mkuu wa Wilaya ya Rombo Kanali Hamis Maiga akiwa kwenye Baraza Maalum la Madiwani Wilayani humo aliwataka madiwani kuongeza ushirikiano na watendaji ili waweze kupata matokeo bora katika halmashauri hiyo.

Katibu Tawala Msaidizi Seksheni ya Serikali za Mitaa Grace Makiluli, amewataka Watendaji kuhakikisha wanazingatia na kutekeleza hoja zote zinazotolewa na Mkaguzi  ili waweze kubaki na hati safi.