MKOA WA KILIMANJARO UNAIHITAJI TASAF

Posted on: August 28th, 2018

Mkoa wa Kilimanjaro umetajwa kama mkoa unaouhitaji  zaidi mpango wa kunusuru kaya masikini unaosimamiwa na mfuko wa maendeleo ya jamii Tasaf ukilinganishwa na mikoa mingine.

Hayo yamesemwa na waziri wa nchi ofisi ya rais Utumishi na Utawala Bora  Mhe.Kapt.(Mst.) George Mkuchika baada ya kupokea taarifa ya utekelezaji wa mpango wa kunusuru kaya masikini katika mkoa wa Kilimanjaro.

Mhe. Mkuchika amesema ufinyu wa ardhi katika mkoa wa Kilimanjaro unapelekea mwananchi masikini  mwenye nguvu na aliyetayari kujishughulisha hata kwa kilimo cha kujikimu hushindwa kufanya hivyo kwani kila kipande cha ardhi katika mkoa wa Kilimanjaro kinamilikiwa na mtu.

Kufuatia hali hiyo Waziri mkuchika amesema serikali inawaangalia kwa jicho la pekee watu wenye hali duni za kimaisha katika mkoa wa kilimanjaro kwani hawana fursa ya ardhi kama ilivyo katika mikoa mingine.

Mhe mkuchika amewataka waratibu wote wa Tassaf mkoani Kilimanjaro kuhakikisha kuwa kila mwananchi  mwenye sifa ya kunufaika na mpango huo anafikiwa na kunufaika kwa mujibu wa taratibu za Tassaf na uwezo wa mfuko.

Awali akitoa taarifa ya utekelezaji wa mpango huo mratibu wa Tasaf mkoa wa Kilimanjro Bw. Apolinary Seiya amesema Katika awamu zote kumi na tisa (19) za malipo kiasi cha Shilingi  Bilioni 21 zililipwa kwa  walengwa.