RC Mghwira Ataka Nguvu Ziongezwe Kupambana na UKIMWI

Posted on: June 9th, 2017

Wafanyabiashara na taasisi mbalimbali za kijamii zimehamasishwa kuunga mkono kampeni ya “Kili Challenge” inayoendeshwa na mgodi wa dhahabu wa geita kwa ajili ya kuchangisha fedha za mapambano dhidi ya UKIMWI.

Wito huo umetolewa na Mkuu wa Mkoa wa Kilimanjaro Mhe. Anna Mghwira alipokuwa akiwapokea Wapanda Mlima Kilimanjaro na Waendesha Baiskeli waliofadhiliwa na  Mgodi wa Dhahabu wa Geita (GGM) kwa ajili ya kuchangisha fedha za mapambano dhidi ya UKIMWI.

Mhe. Mgwira amesema ushiriki wa wadau wengi zaidi utasaidia kuwa na uwezo wa kufikia malengo ya kitaifa  ya kuwa na sifuri tatu ambazo ni kutokuwa na maambukizi mapya,  unyanyapaa na kutokuwa na vifo vitokanavyo na UKIMWI.

Aidha Mhe. Mghwira ameushukuru Mgodi wa Dhahabu wa Geita  kwa kushirikiana na Tume ya Taifa ya Kudhibiti Ukimwi (TACAIDS) pamoja na wadau washiriki, katika kuandaa na kuwezesha kampeni ya ’’kilimanjaro HIV and AIDS challenge” kila mwaka.

Mgodi wa Dhahabu wa Geita umekuwa ukiendesha kampeni inayoitwa  ’’kilimanjaro HIV and AIDS challenge” ambapo kila mwaka hufadhili wapanda mlima Kilimanjro ili kuchangisha fedha za mapambano dhidi ya UKIMWI.

Kwa mwaka huu jumla ya wapanda mlima  50 waliopanda kupitia lango la machame na kushuka kupitia lango la Mweka lilipo Kibosho wilayani Moshi huku waendesha baiskeli 37 waliendesha baiskeli kuuzunguka mlima Kilimanjaro.